BUNTS NEWS, ಕಟೀಲು: ಕಟೀಲಿನ ಬ್ರಹ್ಮಕಲಶೋತ್ಸವದ ಅಂಗವಾಗಿ ಭಕ್ತರು,
ಸಂಘಸಂಸ್ಥೆಗಳು ಸ್ವಇಚ್ಛೆಯಿಂದ ಕ್ಷೇತ್ರ ಹಾಗೂ ಕ್ಷೇತ್ರದ ಸುತ್ತಮುತ್ತಲಿನ ಪರಿಸರದ ಅಭಿವೃದ್ದಿಗೆ
ಸಹಾಯಹಸ್ತ ನೀಡುತ್ತಿದ್ದಾರೆ. ಕಟೀಲಿನ ಬ್ರಹ್ಮಕಲಶೋತ್ಸವವು ಅನೇಕ ಸಾಮಾಜಿಕ ಕೊಡುಗೆಗಳನ್ನು ನೀಡುವ
ಮೂಲಕ ಮಾದರಿಯಾಗಬೇಕೆಂದು ಕಟೀಲು ಬ್ರಹ್ಮಕಲಶೋತ್ಸವ ಸಮಿತಿ ಅಧ್ಯಕ್ಷ, ಸಂಸದ ನಳಿನ್ ಕುಮಾರ್ ಕಟೀಲು
ಅಭಿಪ್ರಾಯ ವ್ಯಕ್ತಪಡಿಸಿದರು.
ಅವರು ಶ್ರೀ ದುರ್ಗಾಪರಮೇಶ್ವರಿ
ದೇವಸ್ಥಾನ ಕಟೀಲು ಇದರ ಬ್ರಹ್ಮಕಲಶೋತ್ಸವದ ಅಂಗವಾಗಿ ಕ್ಷೇತ್ರದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ,
ಕ್ಷೇತ್ರದ ರಥಬೀದಿಯಲ್ಲಿ ಭೂಮಿಯ ಕೊರತೆಯಿದ್ದು ಈಗಾಗಲೇ ಮುಂಬೈ ಭಕ್ತರ ನೆರವಿನಿಂದ ಖಾಸಗಿ ಭೂಮಿ ಖರೀದಿಸಿ
ಕ್ಷೇತ್ರಕ್ಕೆ ಭೂದಾನ ಮಾಡಿದ್ದಾರೆ. ಉಳಿದ ಖಾಸಗಿ ಭೂಮಿಯ ದಾನಕ್ಕೆ ಭಕ್ತರು ಸಿದ್ದತೆ ನಡೆಸಿದ್ದು
ಮಾತುಕತೆ ಪ್ರಗತಿಯಲ್ಲಿದೆ ಎಂದರು.
ಈಗಾಗಲೇ ವಿವಿಧ ಭಾಗಗಳಿಂದ
ದೇವಸ್ಥಾನ ಸಂಪರ್ಕಿಸುವ ರಸ್ತೆಗಳ ಅಭಿವೃದ್ದಿಗೆ ರಾಜ್ಯ ಸರ್ಕಾರ 25 ಕೋಟಿ ರೂ. ಬಿಡುಗಡೆ ಮಾಡಿದ್ದು
ಕೆಲಸ ಪ್ರಗತಿಯಲ್ಲಿದೆ. ದೇವಳದ ಧ್ವಜಸ್ತಂಭಕ್ಕೆ ಸಂಪೂರ್ಣ ಚಿನ್ನ ಲೇಪಿತ ಕವಚ, ಸುಸರ್ಜಿತ ಆಧುನಿಕ
ಭೋಜನ ಶಾಲೆ, ದೇವಳದ ಎಲ್ಲಾ ವಸತಿಗೃಹ ಆಧುನೀಕರಣ ಇನ್ನಿತರ ಅಭಿವೃದ್ಧಿ ಕಾರ್ಯಗಳು ನಡೆದಿದೆ. ಜತೆಗೆ
ಕಟೀಲಿನ ಸಂಜೀವಿನ ಆಸ್ಪತ್ರೆಯ ವತಿಯಿಂದ ಸುಮಾರು 1 ಕೋಟಿ ರೂ. ವೆಚ್ಚದಲ್ಲಿ ಆಧುನಿಕ ಶೌಚಾಲಯ ವ್ಯವಸ್ಥೆ,
ನಿರಂತರ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆಯೂ ಆಗಿದೆ ಎಂದರು.
ಸುಮಾರು 7 ಕೋಟಿ
ರೂ ವೆಚ್ಚದಲ್ಲಿ ಬ್ರಹ್ಮಕಲಶೋತ್ಸವ ಧಾರ್ಮಿಕ ಕಾರ್ಯಕ್ರಮಗಳು ನಡೆಯಲಿದ್ದು 20 ಲಕ್ಷಕ್ಕೂ ಅಧಿಕ ಭಕ್ತರು
ಕ್ಷೇತ್ರಕ್ಕೆ ಆಗಮಿಸುವ ನಿರೀಕ್ಷೆಯಿದೆ. ಪ್ರತಿದಿನ ಮುಂಜಾನೆ 5ರಿಂದ ರಾತ್ರಿ 12ರ ವರೆಗೆ ನಿರಂತರ
ಅನ್ನದಾನ ಸೇವೆ, ಭಾರತೀಯ ಸಂಸ್ಕೃತಿ ಬಿಂಬಿಸುವ ಕಾರ್ಯಕ್ರಮಗಳು, ರಾತ್ರಿ ಅಂತರಾಷ್ರೀಯ ಮಟ್ಟದ ಕಾರ್ಯಕ್ರಮಗಳು
ನಡೆಯಲಿವೆ.
ಸುದ್ದಿಗೋಷ್ಠಿಯಲ್ಲಿ
ಕ್ಷೇತ್ರದ ಅನುವಂಶಿಕ ಮೊಕ್ತೇಸರರು ಸನತ್’ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು, ಅನುವಂಶಿಕ ಮೊಕ್ತೇಸರರು
ಹಾಗೂ ಅನುವಂಶಿಕ ಅರ್ಚಕ ವಾಸುದೇವ ಆಸ್ರಣ್ಣ, ಅನುವಂಶಿಕ ಅರ್ಚಕ ಲಕ್ಷ್ಮೀನಾರಾಯಣ ಅಸ್ರಣ್ಣ, ಮಾಣಿಲ
ಶ್ರೀ ಮೋಹನದಾಸ ಪರಮಹಂಸ ಸ್ವಾಮೀಜಿ, ಡಾ. ಆಶಾಜ್ಯೋತಿ ರೈ ಮತ್ತಿತರ ಪ್ರಮುಖರು ಇದ್ದರು.
