BUNTS NEWS, ಮಂಗಳೂರು: ಆಳ್ವಾಸ್ ನುಡಿಸಿರಿ-2018ರ ಸಮ್ಮೇಳನವು ನ.16ರಿಂದ 18ರವರೆಗೆ
ಮೂಡುಬಿದಿರೆಯ ವಿದ್ಯಾಗಿರಿಯ ಶ್ರೀಮತಿ ಸುಂದರಿ ಆನಂದ
ಆಳ್ವ ಆವರಣದಲ್ಲಿರುವ ಕವಿ ರತ್ನಾಕರವರ್ಣಿ ವೇದಿಕೆ,
ಆಳ್ವಾಸ್ ನುಡಿಸಿರಿ ಸಭಾಂಗಣದಲ್ಲಿ ಜರುಗಲಿದೆ.
ಪ್ರತಿವರ್ಷದಂತೆ
ಈ ವರ್ಷವೂ ಆಳ್ವಾಸ್
ನುಡಿಸಿರಿಯು ‘ಕರ್ನಾಟಕ ದರ್ಶನ-ಬಹುರೂಪಿ
ಆಯಾಮಗಳು’ ಎಂಬ ಪ್ರಧಾನ ಪರಿಕಲ್ಪನೆಯೊಂದಿಗೆ ನಡೆಯಲಿದೆ. ಕರ್ನಾಟಕದ ಲಿಖಿತ ಹಾಗೂ ಮೌಖಿಕ
ಇತಿಹಾಸಗಳನ್ನು ಅವಲೋಕಿಸುವಾಗ ಕರ್ನಾಟಕತ್ವವನ್ನು ರೂಪಿಸಿದ ವೈವಿಧ್ಯಮಯ ಕಾಣಿಕೆಗಳು,
ಐತಿಹ್ಯಗಳು, ಚರಿತ್ರೆ, ತಾತ್ವಿಕತೆ ಮುಂತಾದವು ಅಗಾಧವಾಗಿ ನಮ್ಮನ್ನು ಸೆಳೆಯುತ್ತವೆ.
ನಾಡು, ನುಡಿ, ಸಾಹಿತ್ಯ, ಸಂಸ್ಕೃತಿ,
ಸಮಾಜ, ರಾಜಕೀಯ, ಶೈಕ್ಷಣಿಕ, ಧಾರ್ಮಿಕವೇ
ಮುಂತಾದ ವಿಚಾರಗಳಲ್ಲೂ ಅವುಗಳ ವೈವಿಧ್ಯಮಯ ಸಾಧ್ಯತೆಗಳು
ದೃಗ್ಗೋಚರವಾಗುತ್ತವೆ. ಈ ಎಲ್ಲಾ ಸಾಧ್ಯತೆಗಳು
ಕಾಲದಿಂದ ಕಾಲಕ್ಕೆ ಕನ್ನಡ ನಾಡನ್ನು
ಕಟ್ಟುತ್ತಾ ಸುಧಾರಣೆಗೆ ಒಳಪಡಿಸುತ್ತಾ ಕರ್ನಾಟಕದ ಅನನ್ಯತೆ ಹಾಗೂ ಅಸ್ಮಿತೆಗಳನ್ನು
ಆಂತರಿಕವಾಗಿಯೂ ಬಹಿರಂಗವಾಗಿಯೂ ಜೀವಂತವಿರಿಸಿವೆ. ಈ ತೆರನಾದ ಜೀವಂತಿಕೆಯಿಂದಲೇ
ಕರ್ನಾಟಕದ ಈ ಬಹುರೂಪತ್ವಕ್ಕೆ ಗೌರವ
ಪ್ರಾಪ್ತವಾಗಿದೆ.
ಈ ಬಗೆಯ ಬಹುರೂಪತ್ವಕ್ಕೆ ಕಾರಣವಾದ
ಅಂಶಗಳನ್ನು ಸ್ಥೂಲವಾಗಿ ಗುರುತಿಸಿ ಅವುಗಳ ಅನನ್ಯತೆಯನ್ನು ಚರ್ಚೆಗೊಡ್ಡುವ
ಹಾಗೂ ಮರುವಿವೇಚನೆಗೊಳಪಡಿಸಿ ಮಥಿಸುವ ಮೂಲಕ ಬರಬಹುದಾದ
ಅಮೃತವನ್ನಾಗಲೀ ಹಾಲಾಹಲವನ್ನೇ ಆಗಲೀ ಮತ್ತೊಮ್ಮೆ ನಿಕಷಕ್ಕೊಡ್ಡುವ
ಪ್ರಯತ್ನವಿದು.
ಕರ್ನಾಟಕದ
ಪ್ರತಿಷ್ಠಿತ ಶಿಕ್ಷಣ ಸಂಸ್ಥೆ ಆಳ್ವಾಸ್
ಶಿಕ್ಷಣ ಪ್ರತಿಷ್ಠಾನ(ರಿ.) ಮೂಡುಬಿದಿರೆಯು ಪ್ರತಿವರ್ಷ
ಆಚರಿಸಿಕೊಂಡು ಬರುತ್ತಿರುವ ನಾಡು-ನುಡಿ-ಸಂಸ್ಕೃತಿಯ
ಸಮ್ಮೇಳನ ’ಆಳ್ವಾಸ್ ನುಡಿಸಿರಿ’ ಕನ್ನಡ
ಬಾಂಧವರ ಸಹಾಯ-ಸಹಕಾರ-ಪ್ರೀತಿ-ವಿಶ್ವಾಸಗಳೊಂದಿಗೆ ಕಳೆದ 14 ವರ್ಷಗಳಿಂದ ಯಶಸ್ವಿಯಾಗಿ
ನಡೆದುಕೊಂಡು ಬಂದಿದೆ. ಇದೀಗ 15ನೇ
ವರ್ಷದ ಸಮ್ಮೇಳನದ ಸಿದ್ಧತೆಗಳು ಭರದಿಂದ ಸಾಗಿದೆ.
ಕನ್ನಡ ನಾಡು, ಕನ್ನಡ ನುಡಿಯ
ಕುರಿತಾದ ಎಚ್ಚರ, ಕನ್ನಡ ಸಂಸ್ಕೃತಿಯ
ಅನನ್ಯತೆಯನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ
ಸಕ್ರಿಯವಾಗಿರುವ ಈ ಸಮ್ಮೇಳನವು ಕನ್ನಡದ
ಒಳಿತಿಗಾಗಿ ದುಡಿಸಬೇಕಾದ ಎಲ್ಲಾ ಆಯಾಮಗಳನ್ನು ದುಡಿಸಿಕೊಂಡು
ಕಾರ್ಯಪ್ರವೃತ್ತವಾಗಿದೆ. ಆದುದರಿಂದಲೇ ಈ ಸಮ್ಮೇಳನವು ಕೇವಲ
ಸಾಹಿತ್ಯ ಸಮ್ಮೇಳನ ಮಾತ್ರವಾಗಿರದೆ ಕನ್ನಡದ
ವಿರಾಟ್ ಸ್ವರೂಪದ ಅಭಿವ್ಯಕ್ತಿಯಾಗಿ ಜನಮನದ
ಗಮನಸೆಳೆಯುತ್ತಿದೆ.
